ខ្ទឹមសមិនត្រឹមតែជាគ្រឿងទេសបង្កើនឱជារសក្នុងមុខម្ហូបប្រចាំថ្ងៃរបស់ប្រជាជនកម្ពុជានោះទេ ប៉ុន្តែវាក៏ជា “ឱសថធម្មជាតិ” ដ៏មានឥទ្ធិពលមួយប្រភេទ ដែលត្រូវបានប្រើប្រាស់តាំងពីសម័យបុរាណមកម៉្លេះ។ តាមការសិក្សាស្រាវជ្រាវវេជ្ជសាស្ត្រទំនើបជាច្រើន រួមទាំងការចុះផ្សាយរបស់ស្ថាប័នសុខភាពពិភពលោក បានបង្ហាញថា សារធាតុសកម្មដ៍សំខាន់នៅក្នុងខ្ទឹមស គឺ “អាលីស៊ីន” (Allicin) ដែលកើតឡើងនៅពេលយើងដំ ឬចិញ្ច្រាំវា ផ្តល់នូវផលប្រយោជន៍យ៉ាងអស្ចារ្យចំពោះរាងកាយ។
ខាងក្រោមនេះជាអត្ថប្រយោជន៍សុខភាពសំខាន់ៗទាំង ៥ យ៉ាងរបស់ខ្ទឹមស ដែលអ្នកគួរដឹង៖
១. ពង្រឹងប្រព័ន្ធការពាររាងកាយ និងប្រឆាំងជំងឺផ្តាសាយ
ការសិក្សាស្រាវជ្រាវបានបង្ហាញថា ការទទួលទានខ្ទឹមស ឬសារធាតុចម្រាញ់ចេញពីខ្ទឹមសជាប្រចាំ អាចជួយជម្រុញ និងពង្រឹងកោសិកាប្រព័ន្ធការពាររាងកាយ ឱ្យមានសមត្ថភាពខ្ពស់ក្នុងការប្រយុទ្ធប្រឆាំងនឹងមេរោគ។ វាអាចជួយកាត់បន្ថយឱកាសនៃការឆ្លងជំងឺផ្តាសាយធំ និងជួយឱ្យអ្នកជំងឺឆាប់ជាសះស្បើយជាងមុន។
២. ជួយកាត់បន្ថយសម្ពាធឈាម
សម្រាប់អ្នកដែលមានបញ្ហាលើសឈាម (Hypertension) ការទទួលទានខ្ទឹមសក្នុងកម្រិតសមស្រប អាចជួយកាត់បន្ថយសម្ពាធឈាមបានយ៉ាងមានប្រសិទ្ធភាព។ សារធាតុសកម្មក្នុងខ្ទឹមស ជួយធ្វើឱ្យសរសៃឈាមរីកធំ និងសម្រួលដល់រលកចរន្តឈាមរត់ ដែលមានប្រសិទ្ធភាពប្រហាក់ប្រហែលនឹងឱសថបញ្ចុះសម្ពាធឈាមមួយចំនួន ដោយគ្មានផលរំខានធ្ងន់ធ្ងរឡើយ។
៣. កាត់បន្ថយជាតិខ្លាញ់អាក្រក់ (LDL) ក្នុងឈាម
ខ្ទឹមសមានសមត្ថភាពជួយកាត់បន្ថយការប្រមូលផ្តុំនៃជាតិខ្លាញ់កូឡេស្តេរ៉ុលអាក្រក់ (LDL) នៅក្នុងសរសៃឈាម បានប្រមាណពី ១០% ទៅ ១៥% ចំពោះអ្នកដែលមានកម្រិតខ្លាញ់ក្នុងឈាមខ្ពស់ស្រាល។ ការរក្សាកម្រិតខ្លាញ់ឈាមឱ្យស្ថិតក្នុងរង្វង់សុវត្ថិភាព អាចកាត់បន្ថយហានិភ័យនៃជំងឺបេះដូង និងគ្រោះថ្នាក់សរសៃឈាមខួរក្បាល។
៤. សម្បូរដោយសារធាតុប្រឆាំងអុកស៊ីតកម្ម ការពារខួរក្បាល
ការបំផ្លាញពីពពួកអុកស៊ីតកម្ម និងរ៉ាឌីកាល់សេរី គឺជាកត្តាចម្បងដែលធ្វើឱ្យកោសិការាងកាយចាស់ជរា និងប៉ះពាល់ដល់ប្រព័ន្ធប្រសាទ។ ខ្ទឹមសសម្បូរទៅដោយសារធាតុប្រឆាំងអុកស៊ីតកម្ម ដែលជួយការពារកោសិកាខួរក្បាល ព្រមទាំងកាត់បន្ថយហានិភ័យនៃជំងឺវង្វេងវង្វាន់ (Alzheimer’s disease) ចំពោះមនុស្សវ័យចាស់។
៥. ជួយបន្សាបជាតិពុលពីលោហៈធ្ងន់ក្នុងរាងកាយ
សារធាតុស្ពាន់ធ័រ (Sulfur) នៅក្នុងខ្ទឹមស មានសមត្ថភាពខ្ពស់ក្នុងការការពារសរីរាង្គខាងក្នុង ពីការបំផ្លាញដោយសារធាតុពុល។ ការសិក្សាមួយទៅលើកម្មកររោងចក្រអាគុយដែលប្រឈមនឹងសារធាតុសំណ (Lead) បានរកឃើញថា ការទទួលទានខ្ទឹមស អាចជួយកាត់បន្ថយកម្រិតសារធាតុសំណក្នុងឈាមរហូតដល់ ១៩% និងកាត់បន្ថយអាការឈឺក្បាលបានយ៉ាងប្រសើរ។
*ចំណាំ៖ ទោះបីជាខ្ទឹមសមានប្រយោជន៍ច្រើនយ៉ាងណាក៏ដោយ លោកអ្នកមិនគួរទទួលទានវាច្រើនហួសប្រមាណឡើយ ជាពិសេសអ្នកដែលមានជំងឺក្រពះពោះវៀន ឬអ្នកដែលកំពុងប្រើប្រាស់ថ្នាំពង្រាវឈាម គួរពិភាក្សាជាមួយគ្រូពេទ្យជំនាញជាមុន។
