និន្នាការទូរស័ព្ទអេក្រង់បត់កំពុងដើរដល់ចំណុចរបត់ថ្មីមួយទៀតហើយ ដោយក្រុមហ៊ុនបច្ចេកវិទ្យាយក្សចិន OPPO ត្រូវបានគេរាយការណ៍ថា កំពុងសម្ងំអភិវឌ្ឍស្មាតហ្វូនអេក្រង់បត់ដែលមានទម្រង់អេក្រង់ធំទូលាយជាងមុន (Wide-aspect ratio) ដើម្បីត្រៀមប្រកួតប្រជែងនៅលើទីផ្សារអន្តរជាតិ។
យោងតាមប្រភពព័ត៌មាន Digital Chat Station លើបណ្តាញសង្គម Weibo បានឱ្យដឹងថា ស្មាតហ្វូនអេក្រង់បត់ជំនាន់ថ្មីរបស់ OPPO នេះ នឹងមានលក្ខណៈសម្បត្តិលេចធ្លោជាច្រើន៖
- ទំហំអេក្រង់៖ អេក្រង់ខាងក្នុងពេលលាតចេញមានទំហំ ៧.៦ អ៊ីញ និងអេក្រង់ខាងក្រៅមានទំហំ ៥.៥ អ៊ីញ។
- បច្ចេកវិទ្យាអេក្រង់៖ ក្រុមហ៊ុនកំពុងចរចាជាមួយដៃគូផ្គត់ផ្គង់ធំៗគឺ Samsung Display និង BOE។
- គន្លឹះបត់បិទជិត (Seamless Hinge)៖ នឹងប្រើប្រាស់បច្ចេកវិទ្យាគន្លឹះបត់ជំនាន់ថ្មី ដែលធ្វើឱ្យផ្ទៃអេក្រង់រាបស្មើ និងស្ទើរតែមិនឃើញស្នាមផ្នត់ទាល់តែសោះ។
- កម្លាំងម៉ាស៊ីន៖ គ្រោងនឹងបំពាក់បន្ទះឈីបលំដាប់កំពូល Snapdragon 8 Elite Gen 6 របស់ក្រុមហ៊ុន Qualcomm។
ទោះជាយ៉ាងណាក៏ដោយ អ្នកគាំទ្រប្រហែលជាត្រូវរង់ចាំយូរបន្តិច ដោយសារប្រភពដដែលបានបញ្ជាក់ថា OPPO គ្រោងនឹងប្រកាសចេញស្មាតហ្វូននេះជាផ្លូវការនៅក្នុងត្រីមាសទី ១ នៃឆ្នាំ ២០២៧ ឯណោះ។ ការដើរយុទ្ធសាស្ត្រយឺតតែច្បាស់នេះ គឺដើម្បីធានាថាខ្លួនអាចផលិតចេញនូវស្មាតហ្វូនដែលមានគុណភាពខ្ពស់ អាចប្រកួតប្រជែងជាមួយគូប្រជែងធំៗដូចជា Huawei Pura X Max ដែលបានបង្ហាញខ្លួនរួចជាស្រេច រួមទាំង Honor និង Vivo ដែលកំពុងអភិវឌ្ឍទម្រង់អេក្រង់ធំ (Wide) នេះដូចគ្នាដែរ។
