ត្រឡាច (Ash Gourd ឬ Winter Melon) គឺជាបន្លែវល្លិមួយប្រភេទដែលប្រជាជនអាស៊ីយើងនិយមយកមកធ្វើជាម្ហូបអាហារតាំងពីបុរាណកាលមក។ យោងតាមការចុះផ្សាយរបស់ប្រភពវេជ្ជសាស្ត្រជំនាញ Healthline បានបង្ហាញថា ត្រឡាចមិនត្រឹមតែជាគ្រឿងផ្សំដ៏ឆ្ងាញ់នៅក្នុងស៊ុប ឬខ្នុរនោះទេ ប៉ុន្តែវាក៏ជាឱសថធម្មជាតិដ៏មានតម្លៃសម្រាប់សុខភាពរាងកាយទាំងមូលផងដែរ។
មានសមាសធាតុទឹកដល់ទៅ ៩៦% ត្រឡាចជាបន្លែដែលមានកាឡូរីទាបបំផុត (ត្រឹមតែ ១៣ កាឡូរីក្នុង ១០០ ក្រាម) ប៉ុន្តែវាសម្បូរទៅដោយជាតិសរសៃ (Fiber) និងសារធាតុប្រឆាំងអុកស៊ីតកម្មសំខាន់ៗដូចជា វីតាមីន C, Flavonoids និង Carotenes ដែលជួយការពារកោសិការាងកាយពីការខូចខាត។
គុណប្រយោជន៍សុខភាពទាំង ៣ នៃផ្លែត្រឡាច៖
- ជំនួយដល់ប្រព័ន្ធរំលាយអាហារ និងសម្រកទម្ងន់៖ ដោយសារមានជាតិទឹកខ្ពស់ និងសម្បូរទៅដោយជាតិសរសៃរលាយ (Soluble Fiber) ត្រឡាចជួយឱ្យប្រព័ន្ធរំលាយអាហារដំណើរការបានល្អ ការពារការទល់លាមក និងជួយឱ្យមានអារម្មណ៍ឆ្អែតបានយូរ ដែលជាជំនួយការយ៉ាងប្រសើរសម្រាប់អ្នកចង់គ្រប់គ្រងទម្ងន់។
- កាត់បន្ថយការរលាកក្នុងរាងកាយ៖ ការសិក្សាបែបវិទ្យាសាស្ត្របានបង្ហាញថា សារធាតុចម្រាញ់ចេញពីសាច់ និងសំបកត្រឡាច មានសមត្ថភាពប្រឆាំងនឹងការរលាក (Anti-inflammatory) ដែលជាឫសគល់នៃជំងឺរ៉ាំរ៉ៃផ្សេងៗ។
- ការពារដំបៅក្រពះ៖ តាមរយៈការពិសោធន៍វេជ្ជសាស្ត្រ សារធាតុចម្រាញ់ពីត្រឡាចអាចជួយការពារ និងកាត់បន្ថយហានិភ័យនៃការកើតដំបៅនៅក្នុងក្រពះបានយ៉ាងមានប្រសិទ្ធភាព។
លើសពីនេះ ត្រឡាចក៏ត្រូវបានគេប្រើប្រាស់ក្នុងឱសថបុរាណចិន និងអាយុរវេទ (Ayurvedic Medicine) ដើម្បីជួយជម្រុញថាមពល បង្កើនមុខងារខួរក្បាល និងបញ្ចុះទឹកនោមផងដែរ។ អ្នកអាចយកបន្លែនេះមកស្ល ស្ងោរ ឬធ្វើជាទឹកបន្លែស្រស់សម្រាប់ញ៉ាំដើម្បីទទួលបានសុខភាពល្អ។
