ប៊័រ (Butter) គឺជាគ្រឿងផ្សំដ៏ពេញនិយមមួយក្នុងការចម្អិនអាហារ ប៉ុន្តែវាតែងតែជាប្រធានបទដេញដោលគ្នាយ៉ាងខ្លាំងក្នុងវិស័យអាហារូបត្ថម្ភ។ អ្នកខ្លះយល់ថាវាផ្ដល់ផលអាក្រក់ ខណៈអ្នកខ្លះទៀតយល់ថាវាផ្ដល់អត្ថប្រយោជន៍។ ផ្អែកលើការបកស្រាយពីអ្នកជំនាញអាហារូបត្ថម្ភ និងការស្រាវជ្រាវពីមន្ទីរពេទ្យ Humanitas សាកលវិទ្យាល័យ Hunimed បានបង្ហាញការពិតជុំវិញគ្រឿងផ្សំមួយនេះ។
១. ហេតុអ្វីបានជាប៊័រត្រូវបានគេព្រមាន?
ផលប៉ះពាល់ចម្បងរបស់ប៊័រ គឺទាក់ទងនឹងខ្លាញ់ឆ្អែត (Saturated Fats)៖
- ការកើនឡើងកូឡេស្តេរ៉ុល៖ ការបរិភោគប៊័រច្រើនពេក បណ្ដាលឱ្យមានការប្រែប្រួលកម្រិតខ្លាញ់ក្នុងឈាម (Dyslipidemia) ដោយបង្កើនកូឡេស្តេរ៉ុលអាក្រក់ (LDL) ដែលអាចទៅកកតាមជញ្ជាំងសរសៃឈាមអាទែ។
- ហានិភ័យជំងឺបេះដូង៖ នៅពេលកូឡេស្តេរ៉ុលអាក្រក់កើនឡើង វាបង្កើនឱកាសនៃការកើតជំងឺក្រិនសរសៃឈាម (Atherosclerosis) និងជំងឺសរសៃឈាមបេះដូងផ្សេងៗ។
២. តម្លៃអាហារូបត្ថម្ភ និងចំណុចវិជ្ជមានរបស់ប៊័រ
ទោះបីជាមានការព្រមាន ប៉ុន្តែប៊័រគុណភាពខ្ពស់ដែលផលិតដោយធម្មជាតិ (មិនប្រើសារធាតុគីមី) ក៏មានអត្ថប្រយោជន៍ខ្លះដែរ៖
- វីតាមីនរលាយក្នុងខ្លាញ់៖ ប៊័រជាប្រភពនៃវីតាមីន A, វីតាមីន E, ផូស្វ័រ និងកាល់ស្យូម។
- ងាយរំលាយ៖ វាជាប្រភេទខ្លាញ់ដែលរាងកាយងាយស្រួលក្នុងការបំប្លែង និងរំលាយ។
៣. អនុសាសន៍របស់អ្នកជំនាញ៖ គួរប្រើប្រាស់បែបណាទើបមានសុវត្ថិភាព?
ដើម្បីរក្សាសុខភាពបេះដូង និងរាងកាយឱ្យបានល្អ អ្នកជំនាញបានណែនាំនូវគោលការណ៍សំខាន់ៗដូចខាងក្រោម៖
- កម្រិតនៃការប្រើប្រាស់៖ មិនគួរប្រើប្រាស់ប៊័រជាប្រចាំថ្ងៃសម្រាប់ការចម្អិនអាហារនោះទេ។ ការកាត់បន្ថយការប្រើប្រាស់ខ្លាញ់ឆ្អែត និងជំនួសមកវិញនូវខ្លាញ់មិនទាន់ឆ្អែត (ដូចជាប្រេងអូលីវ) អាចជួយកាត់បន្ថយកូឡេស្តេរ៉ុលក្នុងឈាមបានពី ៥% ទៅ ១០% ដែលកាត់បន្ថយអត្រាគ្រោះថ្នាក់ពីជំងឺបេះដូងរហូតដល់ ២០%។
- វិធីសាស្ត្រចម្អិន៖ គួរជៀសវាងការយកប៊័រទៅបំពង ឬឆាក្នុងកម្ដៅខ្លាំង ព្រោះវាអាចប្រែប្រួលរចនាសម្ព័ន្ធខ្លាញ់។ ការបរិភោគស្រស់ៗក្នុងកម្រិតល្មម (ឧទាហរណ៍៖ លាបជាមួយនំប៉័ងពេលព្រឹកក្នុងឱកាសខ្លះ ឬប្រើក្នុងនំប្រពៃណី) គឺមិនបង្កហានិភ័យដល់សុខភាពឡើយ។
- របបអាហារមេឌីទែរ៉ាណេ៖ អ្នកជំនាញលើកទឹកចិត្តឱ្យប្រើប្រាស់ប្រេងអូលីវ (Extra Virgin Olive Oil) ជំនួសប៊័រសម្រាប់ការស្លរលក ឬញាំ ព្រោះវាសម្បូរទៅដោយខ្លាញ់ល្អដែលជួយការពារបេះដូង។
