យោងតាមការចុះផ្សាយចុងក្រោយពីភ្នាក់ងារព័ត៌មានបច្ចេកវិទ្យា Android Police បានឱ្យដឹងថា ការមកដល់នៃកំពូលទូរស័ព្ទ Google Pixel 11 នៅក្នុងឆ្នាំ២០២៦ ខាងមុខនេះ ប្រហែលជាមិនមែនជាជម្រើសដ៏ចាំបាច់បំផុតសម្រាប់អ្នកដែលកំពុងកាន់កាប់ Pixel 10 នៅក្នុងដៃនោះឡើយ។
ផ្អែកលើទិន្នន័យបែកធ្លាយ និងការវិភាគលើបទពិសោធន៍ប្រើប្រាស់ជាក់ស្តែង មានមូលហេតុចម្បងៗចំនួន ៣ ដែលអ្នកមិនគួរចំណាយថវិកាលើការដំឡើងស៊េរីថ្មីនេះ៖
១. ការរចនារូបរាងមិនមានអ្វីថ្មីប្លែក៖ រូបភាព Render បង្ហាញថា Pixel 11 Pro XL នៅតែរក្សានូវទម្រង់កាមេរ៉ា “Camera Island” ដដែល ដែលមិនមានការផ្លាស់ប្តូរធំដុំធៀបនឹងជំនាន់មុន ខណៈដែលអ្នកប្រើប្រាស់ភាគច្រើនរំពឹងចង់បានការរចនាបែបសំប៉ែត (Flat design) ដូចទៅនឹងស៊េរី Pixel 10a។
២. បន្ទះឈីបថ្មីនៅជាមន្ទិលសង្ស័យ៖ ទោះបីជា Google គ្រោងនឹងប្តូរមកប្រើប្រាស់ម៉ូដឹមពីក្រុមហ៊ុន MediaTek (ជំនួសឱ្យ Samsung Exynos) ដើម្បីពង្រឹងកម្លាំងថ្ម និងកាត់បន្ថយកម្ដៅក៏ដោយ ប៉ុន្តែអ្នកជំនាញយល់ថា បន្ទះឈីប Tensor G6 គួរតែត្រូវបានតាមដានពីប្រសិទ្ធភាពការងារជាក់ស្តែងជាមុនសិន មុននឹងសម្រេចចិត្តទិញយកមកប្រើប្រាស់។
៣. អាយុកាលនៃការគាំទ្រប្រព័ន្ធប្រតិបត្តិការ៖ ជាមួយនឹងគោលការណ៍គាំទ្រ Software រហូតដល់ ៧ឆ្នាំ របស់ Google ធ្វើឱ្យ Pixel 10 Pro នៅតែអាចប្រើប្រាស់បានយ៉ាងរលូន និងទទួលបានមុខងារ AI ថ្មីៗស្ទើរតែស្មើនឹង Pixel 11 រហូតដល់ដើមឆ្នាំ ២០៣០ ឯណោះ។
សរុបមក ប្រសិនបើឧបករណ៍បច្ចុប្បន្នរបស់អ្នកនៅតែមានដំណើរការល្អ ការរង់ចាំមើលវត្តមានរបស់ Pixel 12 អាចនឹងជារឿងដ៏វៃឆ្លាតជាងការប្រញាប់ប្រញាល់ដំឡើងទៅកាន់ Pixel 11។
