ក្រុមហ៊ុន Vivo បានធ្វើឱ្យកក្រើកទីផ្សារទូរស័ព្ទស្មាតហ្វូនលំដាប់កំពូល (Flagship) ម្តងទៀត ដោយការប្រកាសចេញនូវ Vivo X300 Ultra ដែលត្រូវបានរចនាឡើងមិនត្រឹមតែសម្រាប់តម្រាប់តាមកាមេរ៉ាអាជីពនោះទេ ប៉ុន្តែវាមានសមត្ថភាពការងារដូចជាម៉ាស៊ីនថតពិតៗតែម្តង។ ស្មាតហ្វូននេះកំពុងក្លាយជាប្រធានបទក្តៅគគុកសម្រាប់អ្នកបង្កើតមាតិកា (Creators) ដែលចង់បានគុណភាពរូបភាពកម្រិតខ្ពស់ដោយមិនចាំបាច់រែកពុនកាមេរ៉ាធំៗតាមខ្លួន។
ប្រព័ន្ធកាមេរ៉ា និងគ្រឿងបន្សំកម្រិតអាជីព (Modular Photography System)
- កញ្ចប់ជំនួយការថតរូប (Photography Kit)៖ Vivo បានណែនាំស្រោមការពារពិសេសដែលអាចឱ្យអ្នកប្រើប្រាស់ភ្ជាប់បន្ថែមនូវលេនពង្រីក (External Teleconverter Lenses) ទំហំ 200mm និង 400mm សម្រាប់ជំនួយដល់ការថតរូបពីចម្ងាយ ព្រមទាំងអាចបំពាក់ហ្វៀលទ័រ (Filters) ដូចជា ND, UV និង Circular Polarizer បានភ្លាមៗ។
- ឧបករណ៍កាន់ (Camera Grip)៖ មកជាមួយប៊ូតុងចុចថតវីដេអូ កង់រំកិលពង្រីក (Zoom Lever) ប៊ូតុង Shutter និងកង់សម្រាប់កំណត់មុខងារ (Scroll Wheel) ផ្តល់អារម្មណ៍ដូចកំពុងកាន់ម៉ាស៊ីនថត DSLR។
សមត្ថភាពលំដាប់កំពូល និងកម្រិតភាពច្បាស់មិនធ្លាប់មាន
- កាមេរ៉ាចម្បង (Primary Camera)៖ ប្រើប្រាស់សែនស័រជំនាន់ថ្មី Sony Lytia 901 ទំហំធំ 1/1.12-inch ជាមួយទំហំរូបភាពរហូតដល់ 200MP និងមានប្រវែង Focal Length 35mm ដែលផ្តល់នូវប្លង់រូបភាពបែបធម្មជាតិ និងច្បាស់ល្អបំផុត។
- កាមេរ៉ាពង្រីក (Telephoto System)៖ បំពាក់សែនស័រ Samsung HP0 ទំហំ 200MP (1/1.4-inch) កម្រិត zoom 85mm (f/2.7) ថតរូបមនុស្ស (Portrait) បានយ៉ាងស្អាតដាច់ និងរក្សាពណ៌ស្បែកបានធម្មជាតិ។
- កាមេរ៉ាមុំទូលាយ (Ultra-Wide)៖ ប្រើប្រាស់សែនស័រទំហំធំ 1/1.28-inch ជាមួយលេន 14mm ធានាថាការថតប្លង់ទូលាយមានពន្លឺ និងព័ត៌មានរូបភាពច្បាស់ល្អ។
សមត្ថភាពវីដេអូសម្រាប់ផលិតភាពយន្ត (Cinematic Video)
- កម្រិតថតខ្ពស់បំផុត៖ កាមេរ៉ាក្រោយទាំង 3 គ្រាប់ អាចថតវីដេអូបានដល់កម្រិត 4K ក្នុងល្បឿន 120fps និង 8K ក្នុងល្បឿន 30fps។
- មុខងារសម្រាប់អ្នកអាជីព៖ គាំទ្រការថតបែប Log (Samsung APV Codec) សម្រាប់យកទៅកែច្នៃពណ៌ (Color Grading) ក្នុងកម្មវិធី DaVinci Resolve និងមានប្រព័ន្ធទប់លំនឹងកម្រិតខ្ពស់ (Ultra Stabilization) ការពារការរញ្ជួយបានយ៉ាងមានប្រសិទ្ធភាព។
