យោងតាមប្រភពព័ត៌មានចុងក្រោយពីភ្នាក់ងារសារព័ត៌មានបច្ចេកវិទ្យាល្បីៗ រួមមាន 9to5Mac និង Macworld បានឱ្យដឹងថា Apple គ្រោងនឹងបញ្ឈប់ការផលិត iPhone ពណ៌ទឹកក្រូច (Cosmic Orange) ដែលជាពណ៌ដ៏ទាក់ទាញបំផុតនៅលើ iPhone 17 Pro នាសម័យកាលនេះហើយ។ ការសម្រេចចិត្តនេះ ធ្វើឡើងស្របពេលដែល Apple ត្រៀមបង្ហាញខ្លួនត្រកូល iPhone 18 Pro នៅចុងឆ្នាំ ២០២៦ ខាងមុខ ជាមួយនឹងជម្រើសពណ៌ថ្មីប្លែកអារម្មណ៍ជាងមុន។
តាមរបាយការណ៍បានបង្ហាញថា ពណ៌ដែលនឹងមកដណ្តើមតំណែង “ពណ៌ឯក” (Signature Color) ប្រចាំឆ្នាំ ២០២៦ គឺពណ៌ “Dark Cherry” ដែលជាប្រភេទពណ៌ក្រហមក្រម៉ៅ (ស្រដៀងពណ៌ស្រាក្រហម) មើលទៅមានភាពថ្លៃថ្នូរ និងប្រណិតខ្លាំង។ ក្រៅពីពណ៌ Dark Cherry គេក៏រំពឹងថា iPhone 18 Pro នឹងមានជម្រើស ៣ ពណ៌ផ្សេងទៀតគឺ៖ ពណ៌ខៀវស្រាល (Light Blue), ពណ៌ប្រាក់ (Silver) និងពណ៌ប្រផេះក្រម៉ៅ (Dark Gray)។
ការផ្លាស់ប្តូរពណ៌នេះ គឺជាយុទ្ធសាស្ត្រទូទៅរបស់ Apple ដែលតែងតែផ្លាស់ប្តូរពណ៌ពិសេសរបស់ខ្លួនជារៀងរាល់ឆ្នាំ ដើម្បីជំរុញការលក់ និងបង្កើតភាពខុសប្លែកគ្នារវាងស៊េរីចាស់ និងស៊េរីថ្មី។ ទោះបីជាពណ៌ Cosmic Orange ទទួលបានការគាំទ្រខ្លាំង ជាពិសេសនៅទីផ្សារអាស៊ី ប៉ុន្តែសម្រាប់អ្នកដែលចង់បាន iPhone ស៊េរីឆ្នាំ ២០២៦ គឺត្រូវត្រៀមខ្លួនទទួលយកភាពស៊ីវិល័យនៃពណ៌ Dark Cherry វិញម្តង។
ក្រៅពីការផ្លាស់ប្តូរពណ៌ ព័ត៌មានលេចធ្លាយក៏បានបញ្ជាក់ផងដែរថា Apple អាចនឹងបង្ហាញខ្លួន iPhone Ultra ដែលជាទូរសព្ទបត់បានដំបូងបង្អស់របស់ខ្លួន (Foldable iPhone) នៅក្នុងព្រឹត្តិការណ៍ខែកញ្ញា ឆ្នាំ ២០២៦ នេះផងដែរ។
