ក្រុមហ៊ុនយក្សកូរ៉េខាងត្បូង Samsung Display ត្រូវបានរាយការណ៍ថា កំពុងអភិវឌ្ឍបន្ទះអេក្រង់ OLED ស៊េរីថ្មីបំផុតដែលមានលេខកូដ “M16” ដើម្បីផ្គត់ផ្គង់ដល់ស្មាតហ្វូនលំដាប់បង្កប់នាពេលអនាគត រួមមាន iPhone 18 របស់ Apple និង Pixel 11 របស់ Google។
តាមប្រភពព័ត៌មានពីឧស្សាហកម្មខ្សែចង្វាក់ផ្គត់ផ្គង់ បន្ទះអេក្រង់ប្រភេទ M16 នេះ គឺជាការវិវត្តន៍ដ៏សំខាន់ចេញពីស៊េរី M14 ដែលកំពុងប្រើប្រាស់លើ iPhone 16 Pro នាពេលបច្ចុប្បន្ន។ បច្ចេកវិទ្យា M16 ផ្តោតសំខាន់ទៅលើការបង្កើនពន្លឺ (Brightness) ឱ្យកាន់តែខ្លាំងជាងមុន ការកាត់បន្ថយការស៊ីថាមពលថ្ម និងការពន្យារអាយុកាលនៃការប្រើប្រាស់បន្ទះអេក្រង់ឱ្យបានយូរជាងមុន។
ការជ្រើសរើសយក Samsung ជាអ្នកផ្គត់ផ្គង់ចម្បងនេះ បង្ហាញឱ្យឃើញថា ទោះបីជា Apple ព្យាយាមពឹងផ្អែកលើ LG Display ឬ BOE ក៏ដោយ ក៏បច្ចេកវិទ្យាកម្រិតខ្ពស់បំផុតរបស់ Samsung នៅតែជាជម្រើសមិនអាចខ្វះបានសម្រាប់ផលិតផល Flagship។ ចំណែកឯ Google វិញ ក៏នឹងបន្តប្រើប្រាស់អេក្រង់លំដាប់ខ្ពស់បំផុតនេះសម្រាប់ត្រកូល Pixel 11 ដើម្បីប្រកួតប្រជែងទីផ្សារស្មាតហ្វូនកម្រិតខ្ពស់ផងដែរ។
