ខណៈពេលដែលពិភពលោកកំពុងជក់ចិត្តនឹងស្មាតហ្វូនអេក្រង់បត់ (Foldable) ក្រុមហ៊ុនយក្សកូរ៉េខាងត្បូង Samsung កំពុងត្រៀមបោះជំហានទៅរកបច្ចេកវិទ្យាថ្មីមួយទៀត គឺស្មាតហ្វូន «អេក្រង់រុញ» (Slidable)។ យោងតាមឯកសារប៉ាតង់ថ្មីបំផុត (លេខបោះពុម្ព ២០២៦០០៩៥៥១៩) ដែលទើបតែត្រូវបានលាតត្រដាងដោយអង្គការកម្មសិទ្ធិបញ្ញាពិភពលោក (WIPO) Samsung បានបង្ហាញពីយន្តការនៃឧបករណ៍ដែលអាចពង្រីកផ្ទៃអេក្រង់ដោយការរុញឡើងលើ។
តើស្មាតហ្វូនអេក្រង់រុញនេះមានអ្វីពិសេស?
មិនមែនជាការបត់ដូចស៊េរី Galaxy Z នោះទេ ប៉ុន្តែវាប្រើប្រាស់យន្តការរុញ (Vertical Sliding)។ នៅពេលស្ថិតក្នុងសភាពធម្មតា វាមានទំហំតូចបង្រួម ងាយស្រួលកាន់ និងដាក់តាមខ្លួន ប៉ុន្តែនៅពេលអ្នកត្រូវការផ្ទៃអេក្រង់ធំសម្រាប់ទស្សនាវីដេអូ ឬធ្វើការងារ ចលនារុញឡើងលើនឹងទាញផ្ទៃអេក្រង់ដែលបង្កប់នៅខាងក្នុងឱ្យលេចចេញមក ធ្វើឱ្យអេក្រង់រីកធំជាងមុនភ្លាមៗ។
លក្ខណៈបច្ចេកទេសសំខាន់ៗ៖
- អេក្រង់៖ ក្នុងសភាពធម្មតាមានទំហំ ៥.១ អ៊ីញ (កម្រិត ១៦:៩) ហើយអាចពង្រីកបានដល់ ៦.៧ អ៊ីញ (កម្រិត ២២:៩)។
- រចនាសម្ព័ន្ធ៖ ប្រើប្រាស់បន្ទះ “Lattice Plate” ដើម្បីទ្រទ្រង់អេក្រង់ប្រភេទ Flexible Display ឱ្យមានភាពរឹងមាំ និងមានចលនារលូនបំផុតនៅពេលរុញចុះឡើង។
- កាមេរ៉ា៖ ប្លង់មេបង្ហាញពីការរៀបចំកាមេរ៉ាក្រោយចំនួន ៣ គ្រាប់ តម្រៀបគ្នាជាជួរដេក ដែលស្ថិតនៅផ្នែកថេរនៃតួម៉ាស៊ីន។
ទោះបីជា Samsung បានដាក់បង្ហាញគំនិតច្នៃប្រឌិតនេះនៅក្នុងព្រឹត្តិការណ៍ MWC 2026 កន្លងទៅក៏ដោយ ប៉ុន្តែការចុះបញ្ជីប៉ាតង់ជាផ្លូវការនេះបានសរបញ្ជាក់ថា គម្រោងនេះកំពុងស្ថិតក្នុងដំណាក់កាលអភិវឌ្ឍន៍យ៉ាងសកម្ម។ អ្នកជំនាញយល់ថា នេះគឺជាយុទ្ធសាស្ត្រថ្មីរបស់ Samsung ក្នុងការដោះស្រាយបញ្ហា “ស្នាមផ្នត់” នៅលើអេក្រង់បត់ និងផ្ដល់ជម្រើសកាន់តែសម្បូរបែបសម្រាប់អ្នកប្រើប្រាស់ដែលចង់បានភាពប្លែកគេ និងប្រសិទ្ធភាពការងារខ្ពស់។
យ៉ាងណាមិញ ក្រុមហ៊ុននៅមិនទាន់បញ្ជាក់ពីកាលបរិច្ឆេទច្បាស់លាស់ក្នុងការដាក់លក់លើទីផ្សារនៅឡើយទេ។ ប៉ុន្តែប្រសិនបើវាលេចរូបរាងឡើងមែន វានឹងក្លាយជាបដិវត្តន៍ថ្មីមួយទៀតក្នុងឧស្សាហកម្មទូរស័ព្ទដៃសកល។
