ក្នុងយុទ្ធសាស្ត្រពង្រីកឥទ្ធិពលរបស់ខ្លួនឱ្យកាន់តែខ្លាំងក្លានៅលើទឹកដីសហរដ្ឋអាមេរិក ក្រុមហ៊ុន Motorola កំពុងត្រៀមបញ្ចេញថេប្លេត (Tablet) ស៊េរីថ្មី ដែលនេះជាសញ្ញាមួយបង្ហាញពីការវិលត្រឡប់មកដណ្តើមចំណែកទីផ្សារឧបករណ៍អេក្រង់ធំ បន្ទាប់ពីទទួលបានជោគជ័យលើការលក់ទូរស័ព្ទឆ្លាតវៃកម្រិតមធ្យមនាពេលកន្លងមក។
តាមរយៈរបាយការណ៍ចុងក្រោយពី Android Police បានឱ្យដឹងថា ការសម្រេចចិត្តដាក់លក់ថេប្លេតនៅអាមេរិកនេះ គឺជាផ្នែកមួយនៃផែនការ “មហិច្ឆតាធំ” របស់ Motorola ដើម្បីក្លាយជាជម្រើសទី៣ ដ៏រឹងមាំបន្ទាប់ពី Apple និង Samsung។ ថ្វីត្បិតតែលក្ខណៈសម្បត្តិបច្ចេកទេសលម្អិតមិនទាន់ត្រូវបានទម្លាយទាំងស្រុង ប៉ុន្តែគេរំពឹងថា Motorola នឹងផ្តោតសំខាន់លើ “តុល្យភាពរវាងតម្លៃ និងសមត្ថភាព” ដែលជាចំណុចខ្លាំងរបស់ខ្លួន។
អ្នកវិភាគយល់ឃើញថា នេះគឺជាឱកាសមាសសម្រាប់ Motorola ក្នុងការទាក់ទាញអ្នកប្រើប្រាស់ដែលចង់បានឧបករណ៍ដែលមានគុណភាពខ្ពស់ ប៉ុន្តែមានតម្លៃសមរម្យជាង iPad ឬ Galaxy Tab។ ប្រសិនបើ Motorola អាចផ្តល់នូវបទពិសោធន៍ប្រើប្រាស់រលូន និងថាមពលថ្មកាន់បានយូរ នោះវានឹងក្លាយជាការផ្លាស់ប្តូរថ្មីមួយក្នុងសមរភូមិបច្ចេកវិទ្យា។
