បន្ទាប់ពីការលេចធ្លាយរូបរាង CAD នៃត្រកូល Pixel 11, Pixel 11 Pro និង Pixel 11 Pro XL កាលពីពេលថ្មីៗនេះ ពិភពបច្ចេកវិទ្យាកំពុងផ្ដោតការចាប់អារម្មណ៍យ៉ាងខ្លាំងទៅលើសមត្ថភាពខាងក្នុងជាជាងរូបរាងខាងក្រៅ។ ទោះបីជា Pixel 10 ទទួលបានជោគជ័យក្នុងការដោះស្រាយបញ្ហាកម្ដៅជាមួយបន្ទះឈីប Tensor G5 ក៏ដោយ ប៉ុន្តែ Google នៅមានកិច្ចការជាច្រើនទៀតដែលត្រូវធ្វើ ដើម្បីប្រកួតប្រជែងជាមួយគូសត្រូវរុករានដូចជា Apple និង Samsung។
ខាងក្រោមនេះគឺជាចំណុចគន្លឹះចំនួន ៥ ដែល Google ចាំបាច់ត្រូវដោះស្រាយក្នុងឆ្នាំ ២០២៦៖
១. កម្លាំងម៉ាស៊ីន (True Performance):
ទោះបីជាបន្ទះឈីប Tensor G5 ដើរត្រជាក់ជាងមុន ប៉ុន្តែកម្លាំងរបស់វានៅតែមានគម្លាតឆ្ងាយពី Snapdragon 8 Elite របស់ Qualcomm។ សម្រាប់ Pixel 11 ដែលរំពឹងថានឹងប្រើ Tensor G6 (បច្ចេកវិទ្យា ២ ណាណូម៉ែត្រពី TSMC) អ្នកប្រើប្រាស់ចង់ឃើញកម្លាំងម៉ាស៊ីនដែលខ្លាំង និងអាចលេងហ្គេមកម្រិតធ្ងន់បានដោយរលូន មិនមែនត្រឹមតែខ្លាំងខាងផ្នែកបញ្ញាសិប្បនិម្មិត (AI) នោះទេ។
២. ថាមពលថ្មដែលកាន់បានច្រើនថ្ងៃ:
ខណៈដែលបច្ចេកវិទ្យាថ្ម Silicon-Carbon កំពុងត្រូវបានដាក់ឱ្យប្រើប្រាស់ដោយក្រុមហ៊ុនចិនជាច្រើន ដូចជា OnePlus និង Honor ដែលអាចផ្ទុកថាមពលបានដល់ទៅជាង 6000mAh ឬ 7000mAh នោះ Google នៅតែប្រើប្រាស់ថ្មកម្រិតមធ្យមនៅឡើយ។ Pixel 11 គួរតែឈានជើងចូលក្នុងយុគសម័យថ្មយក្ស ដើម្បីធានាការប្រើប្រាស់បាន ២ ទៅ ៣ ថ្ងៃដោយមិនបារម្ភ។
៣. ល្បឿនសាកថ្មដែលលឿន និងមានស្ថិរភាព:
នេះជាចំណុចខ្សោយរ៉ាំរ៉ៃរបស់ Pixel។ ការសាកថ្មត្រឹម ៣០ វ៉ាត់ ឬ ៤៥ វ៉ាត់ គឺយឺតខ្លាំងណាស់បើធៀបនឹងគូប្រជែង។ Google ចាំបាច់ត្រូវបង្កើនល្បឿនសាកថ្មឲ្យបានដល់កម្រិត ៦៥ វ៉ាត់ ឬ ៨០ វ៉ាត់ ដើម្បីផ្ដល់ភាពងាយស្រួលដល់អ្នកប្រើប្រាស់សម័យថ្មី។
៤. មុខងារ Software ដែលមានប្រយោជន៍ពិតប្រាកដ:
កន្លងមក មុខងារមួយចំនួនដូចជា Magic Cue ឬ Daily Hub ហាក់មិនទាន់ផ្ដល់អត្ថប្រយោជន៍ពេញលេញដល់អ្នកប្រើប្រាស់នៅឡើយ។ សម្រាប់ Pixel 11 អ្នកគាំទ្រចង់ឃើញមុខងារ AI ដែលឆ្លាតវៃ និងអាចយកមកប្រើប្រាស់ក្នុងជីវភាពរស់នៅប្រចាំថ្ងៃបានជាក់ស្ដែង និងមានស្ថិរភាពខ្ពស់។
៥. ការដំឡើងទំហំផ្ទុកទិន្នន័យ (Base Storage):
ក្នុងឆ្នាំ ២០២៦ ការផ្ដល់ទំហំត្រឹម 128GB គឺមិនគ្រប់គ្រាន់ទៀតទេ។ Google គួរតែដើរតាមគន្លងរបស់ Apple ក្នុងការដាក់ទំហំ 256GB ជាកម្រិតស្ដង់ដារចាប់ផ្ដើមសម្រាប់គ្រប់ម៉ូឌែលទាំងអស់ ដើម្បីឆ្លើយតបទៅនឹងតម្លៃលំដាប់ Flagship របស់ខ្លួន។
